28.3.09

كان عود خشب



هنا من شهور ..يمكن سنين


مر الجنايني من هنا


رمى بذرته.... بذرة دهب


يحضنها طين...
وبقوة يقسمها الجنين...من منتصفها لفلقتين


وبالخجل .. ومن العجب...


يشب من بين الضلوع


عود الخشب


يقف ضعيف.. على ساق ضعيف.. على جذر أضعف من كده


وبقدرة اللي برحمته... تطلع جذور اللي بعددها اتكونت... أعواد خشب


كان عود وحيد..بيها احتمى شب ونما


ومع الشهور... يمكن سنين


بقى عود متين


يطلع نهار... يصحى يصبح ع العيدان الموجودين


ومحوطين...من هناك ومن هنا


أيوة صحيح العود نما


بقى عود متين.. على ساق متين.. على جذر أمتن من كده


إنما.... زي الحكاوي ما سجلت...واتقالنا..


إنه عزم يسيب هنا


ويروح مكان.. غير اللي شاف من أمكنة


ويسيب عيدان مولودة لأجله تحوطه


أيوة صحيح بقى عود متين


لكن وحيد


عارف ملامحه من بحيرة قريبة


ومن جديد


بقى عود ضعيف

مرت شهور.. يمكن سنين


والأرض فضيت من جميع الموجودين


زي الحكاوي ماسجلت.. واتقالنا


"كان فيه هنا... وف يوم ماطلّش فيه نهار ولا بان قمر


زاد المطر...كان عود خشب


ثم انكسر"


.....