نقطة مية....!

قلمي ف إيدي .... إيدي التانية ساندة الورقة

من هوا طاير.... شايل كل همومي سرقة

تنزل نظرة... ترجع تاني وتكتب كلمة

تطلع نظرة... تيجي وشايلة معنى الحكمة

بين الشارع ..

واللون الازرق..

قلبي اتشعلق..

وعشان تقف الحيرة لفترة..

تنزل نقطة... نقطة مية تبل الورقة...

ماهي مش فارقة..

تفرق ايه عن نقطة مطرة جوه الرسمة؟!!...

نقطة مية.. حضنت خط الحبر الباهت..

صبحت زرقا...

عاد البحر ضحك للدنيا..

حتى السما شربت من لونها..

طلعت شمس اليوم التاني فوق الرسمة..

غارت منها..

شالت كل آثار المية..

لكن النقطة لسه مكانها...

كل الدنيا هو مكانها..

نسيت عيني حدود الشارع.. بقت الرسمة كل كيانها...

ولسّاه قلمي ساكن إيدي..

ولسه التانية ساندة الورقة....