في العشـــرين....

تمر سنيني من تحتي..

سنة واتنين وعشرين..

أزيد خطاويا على راحتي..

كأن العمر عمرين..

أتاري العمر قدامي طريق بيضيق..

ومن ضيقه يبان أطول..

وألاقي عنيا بتاخدني لغيره طريق..

هناك أفتح ببان وأوصل..

أمد ف مشيي من تاني..

ألاقي السكة وخداني.. وبتجيبني لمكان مألوف..

وآخر خطوة سبناها..

ف طريق العمر لقيناها..تزيد خطوة يزيد الخوف..

يزيد خوفنا على بكره ومن بكره..

ومن بكره.. تتوه فكرة ورا فكرة..

ومن بكره.. يغوص صوتنا ف تجاعيدنا..

وعشنا سنين.. سنيــن قوتنا مقيدنا..

تموت شمعة في عز الليل..

يضيع الحلم من إيدنا..

تعيش لمعة أمل ف نهار..

بنور الشمس هيقيدنا..

يصحينا .. يدفينا... ويحيينا سنين جاية..

ولا يفرق ميلاد خطوة.. تزيد بيها خطاويا..

ولا يفرق يزيد عمري سنة واتنين وعشرين..

ولا يفرق .. أنا عندي.. مكان العمر عمرين..