يا صاحبي..

بتفرحلي يا صاحبي..

لما تسمع صوت غنايا..

تقولي علّي الصوت كمان..

يسمع جميع الموجودين..

وبتمدحني يا صاحبي..

لما تقرا حلو شعري..

وأما تسرح بين كلامي..

بين سطوره الموزونين..

وبتطمن يا صاحبي..

لما تتمد الصوابع تلتمس..

ف اللون طريقها ويترسم..

للنيل خضار ع الضفتين..

وتبتسم ليا يا صاحبي..

لما أطول بإيديا عودي ويرتعش..

فيا وريدي.. يكون وتر..

نعزف عليه لحن الحنين..

لكن فاتك ياصاحبي.. تحس نبضي

لما صوتي قال غناوي..

فاتك تبص جوه عيني.. تشوف دموعي

لما حبري كتب حكاوي..

لازم تعرف ياصاحبي..

لما بمسك ريشة وارسم..

تترسم بيها السعادة..

ويترسم قلبي حزين.....